Friday, October 1, 2010

الرصاص " الصجم"

" SAFETY IS FIRST "

الرصاص " الصجم"

من الطبيعي انك تستخدم رصاص " الصجم" حق الام صجمه او سلاحك الهوائي .. وبما انك تستخدم صجم فيعني انك لازم تعتني في اختيارك نوع الرصاص .. لانه بكل بساطه اهوا المسؤول عن اصابه الهدف مو انته .. ولو كنت نقوشي .. مثال : حط بنكه او كلكسه مبلله بماي وارمي هدف معين " اقص ايدي ماراح تحوش " مع انك نقوشي !! وحط رصاص او صجم ماركه وشي مرتب فطبيعي !!!
راح تحوش ............

اليوم ودي اكلمك عن الرصاص , انواعه , احجامه , اشكاله , اوزانه ومتى نستخدمه وليش وشلون ,, بكل ما اوتيت من خبرة ...

واحد :

الرصاص .. ذاك قبل كنا نقول صجم او رصاص بس الحين في صجم المنيوم وفي بلاستك و في مخلوط من الاثنين وفي قطن بعد !!!
فانت راح تحتار منو ومتى وليش استخدم هذا او ذاك !!

اثنين :

انواعه .. طبعا مثلك عارف انه الصجم انواع .. " ما اقصد المادة المصنوع منها الصجم " ... اقصد المتعارف عليه بالسوق ,, المشطوف والمبوز والمدور وكل واحد تقدر تستخدمه بكل سهوله في اي ضرف من الضروف , لكن لو استخدمت النوع الفلاني في الضرف العلاني راح يكون اداءه افضل من غيره ,,

موفاهم !!!
افهمك .. مثلا انا بصيد طير !!  استخدم الامبوز لانه اسرع ودقيق بالمسافات القصيرة " 30 متر او 40 متر " وشرعا افضل لانه يضمن لك اختراق الطير باسرع وقت و قتل افضل..
او انا ابي اتمرن على اهداف او بصفر الدربيل مالي او ابي اتراهن مع الربع منو يصوب افضل من الثاني استعمل الرصاص المشطوف ...
ويمكن انت تبي الاثنين يميع ابي هم اصيد من قريب ابي دقه وهم ابي رصاصه نوعا ما سريعه فاستعمل الصجم الي راسه مدور ..

وعندي لك ملاحظه على الانواع المتعارف عليها ...

المبوز سريع و صياد للمسافات القصير ولمن اقولك قصيرة يعتمد على الجو اذا فيه هوا او لا ,, البخار الي طالع من الارض ,, بعد الهدف عنك ,, قوة سلاحك ,, واخيرا كفاءه مصنعيه الرصاصه ووزنها " اقصد الخراطه بشكل عام "...
بس .. المبوز ينحرف بسرعه لانه اقل نسمه هوا او فقد بالطاقه تخليه يشط .. فهذا يعني انك ما تقدر تعتمد عليه على مسافات طويله مثلي انا " ارمي على 100 متر" واذا كان حجمه صغير 4.5 فلااااااا  سلم على الهدف ...

المشطوف دقيق للمسافات القصيرة و المتوسطه نوعا لكن بسرررررعه يفقد طاقته والسبب انه ويه الرصاصه يدعم الهوا واهوا طاير بشكل مباشر فمنها يتم على وضعيه ثابته لانه الهوا يتوزع دار مدارة فما يسمح له بالانحراف ومنها يفقد طاقه بسرعه ويطيح بسرعه ..

اما المدور يجمع الاثنين يميع فيه شويه سرعه ودقه وخصوصا انه ثلاث ارباع ثقله جدامه ,, وانت حاول ترتب افكارك و تتخيل انا شقصد ,,,

ثلاثه :

احجامه ,, ههه قبل كنا نعرف صجم صغير وصجم كبير بس .. لكن الحين في اكثر من 6 او 7 احجام تختلف باختلاف سلاحه وعيارة .. وطبعا كل حجم له اوزان واشكاله واستخدامات مثل ما ذكرت لك , يعني مو معقوله تستخدم رصاص قياس 50 و تقول بصيد خضيري !!! وفي نفس الوقت مو معقول تستخدم رصاص 4.5 وتقول بصيد غزال !!!
اي غزال لا تستغرب غزاااااااااال ...

اربعه:

اوزانه .. لاتضن انه كل رصاصه من نفس الحجم تتشابه في وزنها مع ماركه ثانيه وان تشابهوا في الشكل .. يعني لمن امسك رصاصه " باركودا عيار 4.5 واقيس وزنها يطلع 12 كرين وفي نفس الوقت لمن اخذ القامو الذهبي عيار 4.5 يطلع وزنها 4.7 كرين .. وللعلم ال 16 كرين يساوي بالضبط جرام واحد ..
ولمن اقول الوزن اختلف فمعنى كلامي السرعه اختلفت والدقه اختلف والاستخدام تغير والصوت بعد ان ما كنت تدري وهم بعد يمكن ما يمشي مع سلاحك ..
مثال: خذ ديانا ال 31 وحط صجم الماني مشطوف وزنه تقريبا 7 كرين .. حلو؟؟ وارمي .. تلاقي دقه ما بعدها دقه ..
وخذ نفس الرصاص وحطه بالديانا المقنوم الهبله المينونه ال 350 وارمي ,, ولك شنو تصير حماااااااااااارااااااااااه .. ليش !!
لانها واااااااااايد اقوى من الرصاص انت حاطه والحل بسيط استخدم رصاص اقوى .. يعني جني اقولك هاك هذي كلنكسه مخفسه واحذفه ,, والله خمس امتار ماراح توصل والي تبي تحوشه ماراح تحوشه .. وانت نفسك اعطيك صميه ,, و واقولك احذف .. راااح توصل بعييييييييييييييد .. مع انت انت نفسك ما تغيرت هاااا!!
اضن فهمتني ..

خمسه :

في ناس تسال .. " اي بس في رصاص راسه احمر او مفتوح او مشرشر او نحاس او او او او او او .. الجواب كلن له استخدامه منه صيد منه لعب منه تخريب ومنه تجميع بس جذي هوايه ,, يعني اناعندي يمكن 50 نوع واستخدم بس 3 او اربع انواع والباجي بس جذي .. وادري في ضعفهم مرتين بالسوق .. بس ما شربيت ليلحين..

مواصفات خاصه :

في صجم يصير نهايته بلاستك وينكتب لك على علبه حق شنو تستخدمه .. وفي رصاص راسه محفور هذا يحقن هوا لمن يطير ولمن يصتدم بشي يفرغ هالهوا بطيرقه انفجاريه ويفتح فتحه بطن الطير مثلا .. وفي صجم يشب ليت واهوا طاير " عاد هذا حده عبيط الصراحه "


شلون اعرف شنو افضل رصاص او صجم حق سلاحي الهوائي ؟؟؟

سؤال الصراحه في محله و نبهني عليه احد الاخوة المهتمين الي اثلجوا صدري في متابعتهم ..


اولا في ماركات لا تقبل النقاش بسبب خراطتها الممتازة و نسبة الخطأ الشبه معدومه في الشكل و الوزن بين رصاصه و الثانيه و الثالثه
وفي ماركات لا تجرب صوبها بسبب سوء مصنعيتها و من واقع تجربتي صرفت عليها فلوس عالفاضي
من الماركات الي افضلها :

Eun Jin
H&N
JSB 
diana
RWS









و طبعا في انواع ثانيه ممكن تكون زينه بس ما مرت علي او ما ذكرتها وممكن تكون بالنسبه لي تعيسه لكن بالنسبه حق غيري ممتازه 


من الماركات الي مالها داعي :


gamo
beeman بعضه مو كله
crossman بعضه مو كله 








و غيرها مثل ما قلت لك ممكن ما مرت علي او تكون زينه لغيري لكن لأ لي 


و ثانيا عندي لك ملاحظه : الرصاص لازم تدير بالك عليه من الطيحات عشان لا ينعوي او من الرمل عشان لا يخشن ولا تخلط معاه رصاص ثاني  و حته لا تقرقش الرصاص بالعلبه و تسويه قرقاشه .. تره تخربه ...


المهم ... بعد ما عرفنا بعض الانواع الزينه و الشينه و الطرق البسيطه في العنايه بالرصاص خل نعرف بالضبط شنو افضل رصاص اقدر استخدمه لسلاحي الهوائي ,,,


القاعده الذهبية تقول : كل ما قلت قوة السلاح الهوائي قل معاه وزن الرصاص المستخدم وان زادت القوة زادت زاد وزن الرصاص المستخدم ,,,


معلومه : وزن الرصاص يقاس بالـــ " grain "   مع العلم ان كل 16 قرين تساوي جرام واحد فقط 
معلومه 2 : الوزن الاعتيادي للصجم الصغير 4.5 اهوا " 8 grains "
و الوزن الاعتيادي للرصاص الكبير 5.5 اهوا الضعف " 16 grain "


اولا :  لازم تعرف قوة سلاحك اشكثر ,, يعني خل ابسطها لك 
اقل من 1000
اكثر من 100
هبله و اكثر من 1250
مووووووووووو صج و تعدي 1500


ثانيا : اذا كانت اقل من الف فهنياك ,, تقدر تستعمل اي رصاص و اي وزن لكن المشكله انه سلاحك المسكين ما عنده القدرة على دفع الرصاص الثقيل فراح تلاقي انه ماراح ينيشن الاهداف البعيده و السبب انه راح يطيح و يفقد قوته بسرعه و السبب الكتكوته الي عندك ما تتحمل 






لكن اذا كانت قوة سلاحك اكثر من الف فحلو و تقدر تستخدم اغلب الانواع الي بالسوق و حته الثقيل راح تلاقي نيشانك حلو فيها ولا باس " بس مو تحطلي هدف على اميه متر و تقول ليش ما حشته !!!! خلك بحدود المعقول "






لكن اذا كانت بنتك هبله و قوتها اكثر من 1250 مثل الماقنوم او البنيامين فلااااااااااا تستعمل معاها رصاص خفيف كللش لانها راح تطيح من عينك و السبب انها راح تبوش و نيشانك راح يخترب على اقصر المسافات و السبب انه السلاح قوة دفعه جبارة مقابل وزن بسيط من الرصاص 


ووايد سمعت ناس تقول " يااااا عمي الديانا ما تسوه بيزه " والمسكين ما يدري انه لو استخدم صجم ثقيل راح تضبط معاه المساله ,, وانا من ناحيتي استعمل رصاص وزنه اكثر من 10 او 12 قران معاها و كاهيه فوووووووووووللااااليه و اشحلاتها ...






لكن اذا كان سلاحك مو صجي مثل الـــ
evanix ar 4, 6 or monster
او 
air force condoor


 فنصيحه استعمل رصاص وزنه يتعدى الـــ 25 قران اقل شوي او اكثر بوايد ممكن يوصل لـــ 32 قران 




اضن حليت اللغز الحين ,,,


وبالاخير ودي اقول لك على جهازين حلو انك تقتنيهم وتستعملهم :
ميزان حساس عشان تقيس وزن الرصاص و لقيته عند نقوشي بالضجيج 




و 
shooting chroony




لقيته عند البلبل الصداح في مزاد الكويت 
و الكروني اهوا جهاز يقيس لك سرعه الرصاصه " ما ابي اشرح عنه الحين بس ان شريت افهمك "


http://www.youtube.com/watch?v=DD-Tp1NFd_o

والحين هاك شويه صور تشرح تقريبا الي بقوله ::::::::::::::::::::::

رصاص مبوز
اغبى رصاص مر علي .. القامو وخر عنه

خفيف وزوين

مضيع قوطيه .. بيماان ثقيل ولا باس فيه

ثقيل وطاقته عاليه بس فيه شويه انحراف

حد امه عجيب .. ثابت وقوي


المدور
وايد حلو .. انا ما اغيره

ثقيل بكل مافي الكلمه من معنى .. ودقيق 

استخدمه بالاف اكس مالتي .. متناهي الدقه

المشطوف
عادي.. بس ميزتها انه عليه صبغ

افضل السيئين في عائله صجم قامو

خفيف ولا باس فيه

ثقيل وطاقه حلوة وانحرافه لك عليه

عمي اسكت كفايه سعر العلبه 15 دينار عند الهدف

اخو الي قبل شوي
رصاص تدمير وتخريب
اتحداك

راسه نحاس ما ينعوي بسهوله

عندي فيديو حقه .. شوفه شسوي بقوطي بيبسي

دمار

بهدله

يخفس الخرده

جربه بجامه محل وانساني

حط لك ثلاث اربع بالسبطانه وارمي وشوف 
موصفات خاصه

مسافات

صوته يخرع " بريتا"

اسرع من غيره بس ما عجبني

كلكم تعرفونه

لا تعليق

سريع و دقيق

هه هذا الي اقولك عنه يشب ليت

الحسنه الوحيد عند قامو

مال تنظيف السبطانه لا تصدق

محفور
ثقيل وحليو بس لا ترمي بعييييييد

يمممممممممه

غبي غبي غاااااابي

ممتاز


شويه لنكات وفيديوات تفيدك
اول شي فيديوي


بعدين الخمه




واي سوال حياك اسال تلاقيني بمزاد الكويت او عاليوتيوب او عالهوت ميل او عالجي ميل : )

نكي وايميلي 
DASHTINOV @ HOT OR G MAIL .COM